Li gundekî Dêrikê av ji ber xwe ve ji bîran diherike

Welat TV - Hewlêr

Gundê Melemerzê yek ji gundên Dêrika Rojavayê Kurdistanê ye, beriya dehên salan bi çem û kaniyên xwe dihat naskirin.

Ji ber barana kêm û zuhabûnê kanî û çem çikiyane.Gundiyan dest bi kolana bîran kir û bi ava bîran hemû pêwîstî û karê xwe yên jiyanê diqedînin.

*Av ji ber xwe ve diherike

Tişta herî balkêş ew e ku ava bîrên gundê Melemerzê bê elektrîk, dînemo û alavên din diherike.

Tevî ku di van salên dawiyê de ava bîran jî kêm bûye, lê bandorê nake ji ber ku av li jor û nêzîk e.

Derdora 10 bîrên gund kar dikin, kûrahiya wan ji 10 ta 50 metrî ye. Gundî karên şûştin, xwarin, avdan û gelek pêwîstiyên din bi wê avê dikin.

Gundên Dêrikê bi çem, kanî, şînatî û xwezaya xwe tên naskirin. Li Hin gundan heta niha çem û kanî hene, û li hinan jî ji ber guhertinên keşûhewayê û ziwabûnê çikiyane.