Serokê Herêma Kurdistanê û fermandarê HSD civiyan

Welat TV - Hewlêr

Serokê Herêma Kurdistanê Nêçîrvan Barzanî li gel fermandarê HSD Mezlûm Ebdî civiya.

Serokatiya Herêma Kurdistanê di daxuyaniyekê de got, di civînê de dawîn pêşhateyên Sûriyê û pêwendiyên HSD û aliyên Siyasî yên Kurdî li Sûriyê li gel hikûmeta Sûriyê, hatin gengeşekirin.

Her weha dîtin û nêrîn derbarî metirsiyên terorê û rûbirûbûna gefên DAIŞê hatin pevguhertin.

Her du aliyan tekezî li ser giringiya hevparî û beşdariya Kurdan û tevaya pêkhateyên Sûriyê di desthilat û birêvebirinê de û gerentîkirina mafên hemûyan, kir. Her weha li ser karê hevbeş û hevkariyê di navbera pêkhateyên Sûriyê de, ji bo parastina ewlehî û aramiyê û rûbirûbûna metirsî û astengiyan, hevnerîn bûn.

Serokatiya Herêma Kurdistanê da zanîn jî, pêwîstiya yekrêzî û tebayîyê di navbera hêzên Kurdî de li Sûriyê weke gerentiyekê ji bo pêkanîna daxwaz û mafên rewa yên Kurdan li wî welatî, û rewşa Kampa Holê û rola Hevpeymaniya Navdewletî li Sûriyê ji bo rûbirûbûna DAIŞê, tewerekî din ê civînê bû.